«Чĕлхе хăйне туса хунă халăхпа çеç вилет. Çавăнпа халăха тăван чĕлхене манма хушни çав халăха манма хушнипе пĕрех»,- тенĕ чăваш халăхне çутта кăлараканĕ  И.Я.Яковлев. 1992 çултан пуçласа ака уйӑхӗн 25- мӗшӗнче Чӑваш чӗлхи кунне уявлатпӑр. Çакӑ вӑл Иван Яковлевич Яковлев çуралнӑ кунӗпе пӗр килет. 2022çулта Чӑваш чӗлхи кунне 30-мӗш хут паллӑ тӑватпӑр. Акан 19-25-мĕшĕсенче Çӗнатикассинчи пĕтĕмĕшле пĕлӳ паракан вăтам шкулта Чăваш чĕлхи эрнине ирттерме палăртрăмăр. Ăна тăван чĕлхе пĕлтерĕшне çĕклес, ачасенче наци мăнаçлăхне аталантарас тĕллевпе йĕркелерĕмĕр.

Иван Яковлевич Яковлев чăваш халăхне çутта кăлараканĕ, педагогĕ, чăваш çырулăхĕпе литературине пуçарса яраканĕ. Аслă вĕрентекенĕмĕр йĕркеленĕ Чĕмпĕр чăваш шкулĕ чăвашсемшĕн хăйне евĕрлĕ культура центрĕ, академийĕ пулса тăнă. Иван Яковлевич ачасене ăс-хакăлпа пĕлÿ парас тĕлĕшпе вырăс шкулĕсемпе пĕр виçене çитерме тăрăшнă. Халăх культурине хăпартас ĕçре тăван чĕлхе пĕлтерĕшĕ пысăк пулнине палăртнă.

Чӑваш чӗлхи кунне халалланӑ «Янра, чӑваш сӑвви-юрри!» мероприятие Çӗнатикассинчи пĕтĕмĕшле пĕлӳ паракан вăтам шкулти пур класс та хаваспах хутшӑнчӗ. Кушманова Т.

(6 класс) П. Хусанкайӑн «Эп чӑваш ачи…» сӑввине илемлӗ вуласа пачӗ. Шӑпчӑк сассиллӗ хӗрсем Осеева Ксения тата Анастасия Ремизова куракансене «Илемлӗ», «Тӑван ял» юрӑсем парнелерӗç .Аслӑ классенчи хӗрсем сцена çине илемлӗ ташӑпа тухрӗç. 5 класс ачисем А. Кӑлканӑн «Хӑравçӑ мулкач» юптарӑвне выляса пачӗç. Уяв чӑваш халахӗн чӗлхи, ташши-юрри пуян, сӑпайла пулнине кӑтартса пачӗ.